Reykhóladagar - Ef ég væri grágæs -

"Ef ég væri grágæs" er skemmtilegt barnaleikrit eftir Ellen Margréti Bæhrenz sem hlaut tilnefningu til Grímunnar árið 2025 sem barnasýning ársins. Sýningin hefur ferðast víða og kemur nú við á Hlunnindasýningunni á Reykhólum þann 13. ágúst kl. 17:00.

Frítt inn!

Leikarar sýningarinnar eru þau Ellen Margrét Bæhrenz og Arnmundur Ernst Backman. Sýningin er ætluð leikskólabörnum og yngri bekkjum grunnskóla og hefur ríkan boðskap sem á sannarlega erindi við börnin okkar. Hún er 30 mínútur að lengd og boðið verður upp á að taka myndir með leikurunum eftir á.

Nánar um sýninguna:

Grjótgerður var afar merkileg lítil vera, grá á litin, alveg eins og steinn. Hún bjó efst uppi á fjalli þaðan sem hún horfði yfir litríka veröldina. En hún var leið og þung á brá, því hún var bara grá, og henni var farið að leiðast að horfa á lífið þjóta hjá. Skyndilega flaug grágæs yfir höfði Grjótgerðar. Vá! Grágæsin var grá, en samt glöð og hýr á brá! Nú var Grjótgerður komin með svarið, hún skyldi láta breyta sér í grágæs. Því næst lagði hún af stað í ótrúlegt ferðalag. Á ferð sinni kynnist hún dularfullum svifverum, stressuðum skógarálfi og kolkrabba, sem í ljós kemur að hefur töframátt. En hvað gerist næst?

Umsagnir:

“Sýningin var mjög lifandi og greip athygli barnanna um leið. Alls konar furðuverur birtust á vegferð Grjótgerðar og vöktu mikla kátínu hjá börnunum. Við í Hagaborg getum svo sannanlega mælt með þessari sýningu.“

„Góður boðskapur í sýningunni og frábært að svo góðum boðskap sé hægt að koma á framfæri á fyndinn og skemmtilegan hátt.“

„Heilt yfir skemmtileg upplifun sem skyldi mikið eftir sig hjá starfsfólkinu og börnunum í Bergheimum.“