Tenglar

7. ágúst 2009 |

Sýningin Dalir - hólar - handverk opnuð á sunnudag

Bátasmiðir að verki á Reykhólum.
Bátasmiðir að verki á Reykhólum.
Sýningin Dalir - hólar - handverk verður opnuð á Ólafsdalshátíðinni á sunnudag og stendur út ágústmánuð. Hún verður þó samtímis á fleiri stöðum því að hér er um að ræða sýningarverkefni í Dölum, við Breiðafjörð og á Ströndum, sem á að stuðla að samstarfi heimafólks og aðkominna um handverk og listir. Náttúra og menning svæðisins eru uppspretta verkanna en skólahús gamla landbúnaðarskólans í Ólafsdal og umhverfi hans er útgangspunktur sýningarinnar.

 

Skólinn var á mörkum þeirra þriggja sýslna sem sýningin spannar og naut stuðnings sveitanna í kring á öndvegisdögum sínum. Vegna þessa var ákveðið að nýta húsið sem þungamiðju sýningarinnar og tengja þaðan í lykilstaði í nágrannasveitarfélögum.

 

Kveikja sýningarinnar er löngun til að taka þátt í mannlífi svæðisins, varpa ljósi á menningarverðmæti, efna til samstarfs við heimafólk og hvetja gesti til könnunar á umhverfi og menningu á Vesturlandi og á Vestfjörðum.

 

Sýningin fer þannig fram á fjórum stöðum: Í húsi gamla Landbúnaðarskólans í Ólafsdal, á Sauðfjársetrinu í Sævangi við Steingrímsfjörð, í Byggðasafni Dalamanna að Laugum í Sælingsdal og í Bátasafni Breiðafjarðar á Reykhólum.

 

Sýningin leiðir gesti um svæðið með því að staðsetja verk sýningarinnar á fjórum stöðum og prenta leiðakort sem jafnframt er sýningarskrá. Verkefnið er samvinnuverkefni sem tengir listir, handverk og byggðarlög og stuðlar að auknu samstarfi milli heimafólks og aðkomufólks, einstaklinga og menningarstofnana á Vestfjörðum og Vesturlandi og víðar.

 

Menningarráð Vesturlands og Vestfjarða ásamt Ólafsdalsfélaginu styrkja viðburðinn. Nýpurhyrna er aðili að verkefninu.

 

Sjá nánar hér.

 

Upplýsingabæklingur sýningarinnar (pdf-skjal, 6,64 Mb).

 

Skrifaðu athugasemd:


Atburðadagatal

« Ma 2022 »
S M Þ M F F L
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31