Tenglar

20. nóvember 2018 | Sveinn Ragnarsson

Ólík sýn á kostnað við Vestfjarðaveg um Reykhóla

Brú yfir að Reykhólum
Brú yfir að Reykhólum
1 af 6

Eins og fram hefur komið þá er nokkur munur á áætlunum Vegagerðarinnar og Multiconsult um kostnað við lagningu Vestfjarðarvegar um Reykhóla og mynni Þorskafjarðar. Munurinn liggur einkum í tveimur atriðum.

 

Fyrra atriðið er að Vegagerðin telur að Reykhólavegur frá Vestfjarðavegi að Reykhólum standist ekki öryggiskröfur og verði hann hluti af Vestfjarðavegi þurfi að leggja nýjan veg í stað hans með verulegum kostnaði sem teljist hluti af framkvæmdarkostnaðinum.

 

Sjónarmið Multiconsult er að vegurinn sé ekki verri en margir aðrir vegir á Íslandi. Verði niðurstaða sú að gera þurfi endurbætur á honum vegna umferðaröryggis sé nauðsyn slíkra endurbóta jafn mikil hvort sem hann er hluti af Vestfjarðavegi eða ekki. Þess vegna eigi ekki að hafa kostnað við nýlagningu eða lagfæringar á honum með í samanburði á kostnaði við aðrar leiðir fyrir Vestfjarðaveg. Vegagerðin telur einnig að ekki sé hægt að nýta núverandi veg frá Reykhólum að Hamarlandi, þar þurfi einnig að leggja nýjan veg. Multiconsult telur hins vegar að hægt sé að nýta veginn sem undirlag fyrir endurbyggingu þess hluta. 

 

Seinna atriðið varðar kostnað við brúargerð. Vegagerðin byggir á eigin reynslutölum en Multiconsult vísar til reynslu Norðmanna þar sem nýjar aðferðir við brúarsmíði, sem nýttar hafa verið á allra síðustu áratugum, hafa leitt til lægri kostnaðar. Brúin yfir Þorskafjörð yrði byggð í einingum sem framleiddar eru á brúarsporðinum og rennt yfir á stöpla.

Brúin yrði boðin út á evrópska efnahagssvæðinu og ljóst að ekki yrði lengra fyrir verktaka að koma með framleiðslutækin og mannafla til Íslands en t.d. Norður-Noregs. Því sé ástæðulaust að ætla að brúarsmíðin verði dýrari hérlendis en þar. 

 

Reykhólahreppur tekur undir þau sjónarmið Multiconsult að ekki sé rétt að taka nýlagningu á Reykhólavegi með í kostnaðarmatið vegna Reykhólaleiðarinnar. Ef vegurinn sé svo slæmur, þá þurfi einnig að gera ráð fyrir endurnýjun hans í kostnaði fyrir aðra vegkosti Vegagerðarinnar. 

 

Helsti óvissuþátturinn varðandi brúarsmíðina er hversu langt er niður á fast og hvort eða hve djúpt kunni að vera niður á setlög í Þorskafirðinum. Reykhólahreppur bað um þessar upplýsingar í júní, en Vegagerðin hefur enn ekki sett þá rannsókn af stað. Gert er ráð fyrir því að hún fari af stað á næstunni, en án hennar getur Reykhólahreppur ekki lokið kostagreiningu sinni skv. lögum. 

 

Samkvæmt Skipulagsstofnun má gera ráð fyrir því að umhverfis- og skipulagsmál muni hugsanlega geta seinkað veglagningu um 0,5 til 1 ár fyrir vegkostinn um Reykhóla. Vegagerðin getur hins vegar strax hafist handa við lagfæringar á veginum um Ódrjúgsháls, Brekkubarm og Gufudal, þar sem lengi hefur verið beðið eftir þeim lagfæringum sem munu nýtast alveg óháð þeim kosti sem fyrir valinu verður. 

 

Multiconsult hefur lagt til að lagður verði láglendisvegur um Reykhóla með um 800 m langri brú yfir mynni Þorskafjarðar (R leið). Þjóðleið framhjá Reykhólum muni styrkja búsetu, verslun og veitingaþjónustu þar og bæta þjónustu við vegfarendur, sérstaklega að vetrarlagi þegar veður geta verið válynd. Brúin yrði 15 m há og því eiga minni skip og þangskurðarprammar greiða leið þar um. Brúin yrði einnig nægilega löng til að tryggja full vatnsskipti í firðinum. Þar með yrði komist hjá því að spilla ósnortnu svæði og landslagsheild við Teigsskóg og mynni Gufufjarðar og Djúpafjarðar.

 

Áætlaður kostnaður Multiconsult við Vestfjarðaveg um Reykhóla er 7,58 milljarðar króna og um Teigsskóg 7,3 milljarðar króna. Í þessum tölum er gert ráð fyrir því að nýr Vestfjarðavegur hefjist við  óbreytt núverandi gatnamót um Reykhólaveg að Reykhólum.  Sjá nánar í nýjustu skýrslu Multiconsult frá nóvember, 2018 og kostamat þeirra síðan í júní 2018. 

 

En hverjir eru mennirnir á bak við vinnu Multiconsult? Fjölmargir sérfræðingar Multiconsult hafa komið að þessari vinnu, en Multiconsult (www.multiconsult.no) er ein stærsta verkfræðistofan í Noregi.

Vegaverkfræðingurinn Lars Peder Larsgård hefur leitt kostagreininguna, en hann hefur hannað vegi í Noregi í áratugi. Brúarverkfræðingurinn Lars Toverud hefur tekið brúarþáttinn uppá sína arma, en Lars er einn þekktasti brúarhönnuður Noregs, státar af nærri 50 ára starfsreynslu og er enn að. Hér má sjá mynd af Tresfjord brúnni sem hönnuð var undir hans stjórn og opnuð var 2016. Sigurður Jens Sigurðsson vegafræðingur, hefur einnig komið þétt að þessari vinnu auk fleiri sérfræðinga Multiconsult í verkfræði, straumfræði, skipulagsfræði o.fl.

 

Hér eru tenglar á kynningar sem Lars Toverud hefur haldið um brúarhönnunarverkefni sín. Annars vegar þegar Lars hélt uppá 40 ára starfsafmæli sitt "Með brýr sér við hjartastað" og hins vegar við vígslu brúarinnar yfir Tresfjord.

 

Tryggvi Harðarson,

sveitarstjóri Reykhólahrepps.

Athugasemdir

Johannes Haraldsson, mivikudagur 21 nvember kl: 12:13

Fyrirsögnin á þessari grein er mjög góð því að þetta var það fyrsta sem stakk mig í augun þegar ég lagðist i að skoða brírnar í Noregi eftir að R leið Multiconsult kom upp á teikniborðið. Nú vil ég taka fram að ég er ekkert persónulega á móti R leið, vil bara að fólkið á vestan og norðanverðum Vestfjörðum fari að komast í vegasamband og það fljótlega, ekki eftir 10 - 15 ár.

Af hverju á brúin yfir Þorskafjörð að vera svona ódýr???

Og það er einmitt gráupplagt að bera hana saman við Tresfjördbrúna. Það gerði ég fyrir 3 mánuðum, og klóraði mér mikið í hausnum.

Tresfjordbrúin er 1290 metra löng kostaði 930 milljónir Nkr árið 2015, þ.e 13.438 milljónir Íkr á verðlagi dagsins í dag. Miðað við lengdarmetraverðið ætti kostnaður við 800 metra brú því að vera 8.335 milljónir og þá er eftir vegagerð frá brúarsporði að Reykhólum og tenging Skálnesmeginn hjá Melaneshólmum.

https://no.wikipedia.org/wiki/Tresfjordbrua

Því miður finn ég enga skýringu á þessum verðmun.

Ingimar Ingimarsson, mivikudagur 21 nvember kl: 13:11

Sæll Jóhannes.

Ánægjulegt að heyra að þú ert ekki persóunulega á móti R-leið. Og við erum sammála um að koma á vegasambandi við sunnan og norðanverða Vestfirði hið fyrsta.

Tresfjordbrúin er mun lengri 1290m, breiðari 13,5m, með 40 metra mestu dýpt þar sem fjörðurinn er dýpstur og hún er 32metra há frá sjávarmáli þar sem hún er hæðst, með 60metra breiða siglingaleið. Allt þættir sem margfalda kostnað miðað við 800m langa 15metra háa og 10metra breiða R-leiðarbrú.

Jón Atli Játvarðarson, mivikudagur 21 nvember kl: 13:40

Þetta er nú alveg óþarfi Jóhannes. Þú hefðir miklu frekar lesið betur um þessar brýr og þá er augljós verðmunurinn.
Tresfjordbrúin er með háa miðju fyrir stærri skip. Þar er brúarhafið 160 m. og hæð undir brúargólf 32 m.
Til að ráða við þessi brúarhöf og hæðina á þeim eru tveir stöplarnir sem bera þetta uppi mjög massífir og stöplarnir beggja vegna við þá líka. Þar á milli eru líka lengri brúarhöf en þau stöðluðu.
Brúin á R leiðinni er 15 m. há og brúarhöfin stöðluð 50 m. löng.
Þetta gefur mér svar við verðmun og vonandi öðrum líka.

Magnús Sigurgeirsson, fimmtudagur 29 nvember kl: 00:50

Vegurinn út Barmahlíð frá afleggjara að Reykhólum ber ágætlega þá umferð sem er í dag ca 40 til 60 bíla á sólahring. Ef á að bæta umferð um vestfirði um hann ca 400 til 600 bílum á sólahring fellur hann algerlega á prófinu hvað varðar umferðaröryggi, ástæðan er vegsýn er lítil sem engin þ.e. miðlínan er heil nánast alla leið, þarna er töluverð umferð landbúnaðar tækja sem eru frekar hægfara, hætta er á að vegfarendur reyni frammúrakstur sem er verulega hættulegur við þessar aðstæður sérstaklega ef um langa flutningabíla er að ræða. En um Vestfjarðaveg fer fjöldi slíkra bíla á sólahring. Fjöldi afleggjara er á þessari leið hver og einn skapar hættu á umferðaslysum. Þessari umferð fylgir mengun og hávaði auk þess að skapa verulega hættu fyrir vegfarendur í námunda við Reykhóla vegfarendur eru gangandi, hjólandi og akandi sem eiga litla samleið með ökutækjum á 90km hraða þarna framhjá, í dag er hraðinn lítill sem enginn þar sem Reykhólar eru endastöð flestra. Til að hámarka umferðaöryggi á að leggja Vestfjaraðveg Þ.H.leiðina þar er nánast bein leið með góða vegsýn og ekki svæði þar sem fólk býr fyrir.

Skrifaðu athugasemd:


Atburðadagatal

« Jl 2022 »
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31