Tenglar

2. febrúar 2014 | vefstjori@reykholar.is

Gullsteinn hlaut verðlaun í Nýsköpunarkeppninni

Jón Árni og Hlynur við afhendingu verðlaunanna í Safnahúsinu á Ísafirði. Ljósm. Sveinn Ragnarsson.
Jón Árni og Hlynur við afhendingu verðlaunanna í Safnahúsinu á Ísafirði. Ljósm. Sveinn Ragnarsson.
1 af 8

„Þetta gerbreytir stöðu okkar á allan hátt. Núna getum við farið að klára húsið og jafnframt að fá meiri rannsóknavinnu hjá sérfræðingum varðandi nýja blöndu með fleiri tegundum af þörungum en við höfum verið með,“ segir Jón Árni Sigurðsson hjá sprotafyrirtækinu Gullsteini sf. á Reykhólum. Dómnefnd Nýsköpunarkeppni Vestfjarða valdi fjögur vestfirsk verkefni í verðlaunasæti og var Gullsteinn eitt þeirra.

 

Fjórðungssamband Vestfirðinga og Atvinnuþróunarfélag Vestfjarða (Atvest) efndu til þessarar frumkvöðlakeppni. Dómnefndin tilkynnti fyrir skömmu hvaða viðskiptaáætlanir skipuðu verðlaunasætin fjögur en ekki kom í ljós fyrr en núna á föstudaginn hvernig þær röðuðust. Þann dag voru viðurkenningarnar afhentar við hátíðlega athöfn í Safnahúsinu á Ísafirði.

 

„Þetta er mikil og ánægjuleg viðurkenning og verður einfaldlega til þess að við getum haldið áfram okkar starfi,“ segir Hlynur Stefánsson hjá Gullsteini.

 

Alls var verðlaunaféð 14 milljónir króna og skiptist þannig að fyrsta sætið hlaut 5 milljónir, annað sætið 4 milljónir, þriðja sætið 3 milljónir og fjórða sætið 2 milljónir. Við mat á viðskiptaáætlunum var m.a. skoðað nýnæmi og áhætta og jafnframt var tekið mið af uppbyggingu atvinnulífs á Vestfjörðum.

 

Verkefnin í fjórum efstu sætunum eru þessi:

  1. Víur – ræktunarfélag fóðurskordýra, sem stefnir á framleiðslu skordýrapróteins.
  2. Icelandic Fish Export í Bolungarvík, sem er að hanna rekjanleikalausnir fyrir sjávarútvegsfyrirtæki.
  3. Gullsteinn á Reykhólum, sem er að þróa vörulínu af lífrænum þara í formi fæðubótarefnis.
  4. Bíldalía á Bíldudal, margmiðlunarverkefni, sem samanstendur af hönnun og kynningu á ævintýralandinu Bíldalíu á veraldarvefnum.

 

Fyrirtækið Gullsteinn sf. á Reykhólum var stofnað 2008 og hefur framleitt þaratöflur og harðfisktöflur auk þess að pakka öðrum vörum. Frá upphafi hefur verið unnið að því að bjóða neytendum hreina, lífræna, íslenska vöru.

 

Jón Árni og Hlynur segja að í framhaldi af nýlegum rannsóknum sé stefnt að því að koma á markað vörunni Ice-Kelp, sem er blanda af þara og þangi. Gullsteinn stefnir að því að sérhæfa sig í þurrkun lífrænna efna sem flokka má sem hráfæði vegna lágs hitastigs og vill við markaðssetninguna nýta sérstöðu Íslands og sérstöðu Breiðafjarðar. Hráefnið sem er í boði úr Breiðafirðinum er hágæðavara og með réttri meðhöndlun má skapa úr því mikil verðmæti. Þeir leggja á það áherslu að fullvinnsla hráefnisins fari fram á Reykhólum.

 

Húsnæði Gullsteins (gamla kaupfélagsútibúið á Reykhólum) er of lítið en fyrirtækið á nýbyggt fokhelt hús að Suðurbraut 3, á milli verkstæðis Guðlaugs Theódórssonar og björgunarsveitarhússins, þar sem ætlunin er að koma upp þurrkverksmiðju. Til staðar er hluti þeirra tækja sem þarf en húsnæðið sjálft er óklárað. Þessi þurrkverksmiðja er grundvöllur þess að hægt sé að framleiða vöru sem samræmist alþjóðlegum stöðlum.

 

Að sögn Jóns Árna og Hlyns er ljóst að áhugi er fyrir Ice-Kelp erlendis og þess vegna sóknartækifæri í útflutningi fullunninnar vöru. Vinna þurfi að markaðssetningu fyrirtækisins sem frumkvöðuls í vinnslu lífrænna sjávarafurða. Staðsetningin og reynsla sem orðin er til innan fyrirtækisins skapa því sérstöðu á markaðnum, sem vert er að nýta.

 

Rannsóknir hafa sýnt fram á að efni eru í þara og þangi sem gagnast mannfólki vel gegn ýmsum kvillum. Frekari rannsókna er þó þörf svo að finna megi þá blöndu af þangi og þara sem fellur best að þörfum líkamans.

 

Gullsteinsmenn ætla að vinna áfram út frá þeirri þekkingu sem hefur skapast við framleiðslu á þaratöflum á undanförnum árum, auk frekari rannsókna. Næg þekking á vinnsluferlinu er til staðar innan fyrirtækisins til að fullvinna efnið milliliðalaust og tryggja þar með gæði og verðmæti vörunnar.

 

Myndir nr. 1-3 tók Sveinn Ragnarsson á Svarfhóli en mynd nr. 4 tók Halldór Sveinbjörnsson, ljósmyndari Bæjarins besta / bb.is á Ísafirði. Á mynd nr. 5 er Jón Árni við uppslátt að grunni nýja hússins við Suðurbraut og á mynd nr. 6 er verið að steypa grunninn. Þær myndir voru teknar í júlí 2012. Á mynd nr. 7 er verksmiðjuhúsið við Suðurbraut í dag og á mynd nr. 8 er núverandi aðsetur Gullsteins, þar sem útibú Kaupfélags Króksfjarðar á Reykhólum var til húsa á sínum tíma.

 

Sjá einnig:

10.11.2013 Myndarleg verðlaun í Nýsköpunarkeppni Vestfjarða

 

Athugasemdir

Ingvar Samuelsson, sunnudagur 02 febrar kl: 16:31

Flott Jón og til hamingju með stirkinn og verlaunarsætið, nú er aldeilis hægt að spíta í lófana og klára húsið og fleira. kveðja Ingvar Samuelsson

Eyvindur, sunnudagur 02 febrar kl: 16:37

Til hamingju með þessa viðurkenningu

Hjalti, sunnudagur 02 febrar kl: 18:16

Til hamingju með styrkinn feðgar, þetta er frábært framtak hjá ykkur, þið eruð vel að þessu komnir. Gangi ykkur allt í hagin á komandi misserum.

Einar Örn Thorlacius fyrrv. sveitarstjóri Reykhólahrepps, sunnudagur 02 febrar kl: 20:16

Heillakveðjur til ykkar félagar. Áfram Reykhólahreppur!

Skrifaðu athugasemd:


Atburðadagatal

« Jn 2022 »
S M Þ M F F L
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30