Tenglar

11. mars 2013 | vefstjori@reykholar.is

Fyrsta heimilisfólkið fluttist inn fyrir réttum 25 árum

Fyrsta heimilisfólkið í Barmahlíð: Játvarður Jökull og Herdís.
Fyrsta heimilisfólkið í Barmahlíð: Játvarður Jökull og Herdís.
1 af 8

Fyrir réttum aldarfjórðungi eða föstudaginn 11. mars 1988 var Dvalarheimilið Barmahlíð á Reykhólum tekið í notkun þegar fyrsta heimilisfólkið fluttist þar inn. Það voru þau Herdís Zakaríasdóttir, húsfreyja í Djúpadal í Gufudalssveit, og Játvarður Jökull Júlíusson, bóndi og fræðimaður á Miðjanesi í Reykhólasveit. Tveimur dögum seinna eða sunnudaginn 13. mars var heimilið vígt með formlegum hætti. Margt var þó enn ófrágengið innanhúss.

 

Forsaga heimilisins frá fyrstu hugmyndum og fram til þess dags þegar það var tekið í notkun spannaði tæpan áratug. Mörg félög og samtök stóðu að þessu mikla framtaki en núna er Barmahlíð að fullu í eigu Reykhólahrepps, auk einnar íbúðar sem er í eigu Öryrkjabandalags Íslands.

 

Fyrsti forstöðumaður Barmahlíðar var María Björk Reynisdóttir hjúkrunarfræðingur. Þegar hún fór skömmu síðar í barneignarleyfi leysti Ingibjörg Kristjánsdóttir hjúkrunarfræðingur í Garpsdal hana af á meðan og tók síðan við starfinu að fullu fáum árum síðar þegar María Björk fluttist brott.

 

Framan af var jafnan talað um forstöðumann Barmahlíðar en á seinni árum er starfsheitið hjúkrunarforstjóri. Þeirri stöðu gegnir nú Þuríður Stefánsdóttir, sem tók við starfinu í ársbyrjun 2006 eða fyrir liðlega sjö árum.

 

Í daglegu tali er heimilið oftast nefnt Dvalarheimilið Barmahlíð eða einfaldlega Barmahlíð. Formlegt heiti þess er hins vegar Hjúkrunar- og dvalarheimilið Barmahlíð enda lýsir það best starfinu þar.

 

Á heimilinu eru 13 hjúkrunarrými og 2 dvalarrými. Auk þess er talsvert um tímabundnar hvíldarinnlagnir.

 

Að jafnaði er starfsfólkið í Barmahlíð um 12-15 manns. Þar af eru margir í hlutastarfi þannig að stöðugildin eru mun færri. Engu að síður er þetta einn af þremur stærstu vinnustöðunum á Reykhólum.

 

Barmahlíðardagurinn er árviss hátíð heimilisins sem haldin er á sumardaginn fyrsta ár hvert. Að þessu sinni ber hann upp á 25. apríl. Þá verður haldið með viðhöfn upp á þetta merkisafmæli eins af helstu hornsteinum Reykhólahrepps.

 

Athugasemdir

Ingibjörg, mnudagur 11 mars kl: 15:09

Til Hamingju með daginn!!!
Man þennan dag fyrir 25 árum, þetta var sannkallaður gleðidagur fyrir okkur öll og mikil lyftistöng í atvinnumálum í héraðinu okkar.
Kveðja Ingibjörg

herdís reynisdóttir, mnudagur 11 mars kl: 19:19

ég var einmitt að horfa á Stikklu þáttinn hans Ómars þar sem hann ræðir við Ólínu á Kinnastöðum þar sem hún segist vonast til að það verði eitthvað af því að byggja Dvalarheimili á Reykhólum eins og komið sé í umræðuna.

fór Ólína á sjálf á Barmahlíð ?

Herdís Erna Matthíasd, mnudagur 11 mars kl: 20:08

Til hamingju með daginn ,já já Ólína kom í Barmahlíð

Einar Örn Thorlacius fyrrv.sveitarstjóri Reykhólahrepps, rijudagur 12 mars kl: 08:34

Árna ykkur heilla með afmælið fyrrverandi sveitungar mínir!

Skrifaðu athugasemd:


Atburðadagatal

« Janar 2022 »
S M Þ M F F L
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31