Tenglar

14. mars 2014 | vefstjori@reykholar.is

Dælunum í Nesi lokað nánast fyrirvaralaust

Eldsneytisdælum N1 í Króksfjarðarnesi verður lokað á mánudaginn. Tímasetningin á þessari nánast fyrirvaralausu lokun hefur vakið megna óánægju, einkum hjá þeim sem eru með rekstur í kaupfélagshúsinu gamla yfir sumartímann. Tankarnir í Nesi eru komnir á aldur og þyrfti annað hvort að skipta um þá ef þarna ætti að vera eldsneytissala til frambúðar, eða grípa til annarra aðgerða og fá frekari undanþágu til notkunar þeirra fram á haustið.

 

Tankarnir eru rétt við kaupfélagshúsið en þar verða Handverksfélagið Assa, nytjamarkaður, kaffihús, Arnarsetur Íslands og upplýsingaþjónusta fyrir ferðafólk starfandi í sumar eins og undanfarin ár. Búið er að skipuleggja starfið og ráða starfsfólk.

 

Vegna þessarar starfsemi í Nesi hefur verið skorað á N1 að fresta lokuninni fram á haustið. „N1 hefur ekki getað komið með nein rök fyrir því að það liggi svona mikið á að loka þessu og hafa kennt bæði Heilbrigðiseftirliti og Olíudreifingu um að það verði að loka þessu strax, en hvorugur þessara aðila vill kannast við það“, segir einn þeirra sem að áskoruninni standa í samtali við vefinn.

 

„N1 hefur líka kennt því um að þarna hafi verið stolið talsverðu af eldsneyti. Nesverslun sem er umboðsaðili fyrir N1 í Króksfjarðarnesi hefur boðist til að setja upp og sjá um eftirlitsmyndavélar við dælurnar, en það hefur ekki fengið neinar undirtektir hjá N1. Gera má ráð fyrir að búið sé að prenta flesta ferðabæklinga fyrir sumarið og þá eru þessar dælur merktar þar inn, sem kemur til með að valda ferðafólki vandræðum. N1 hefur ekki heldur haft fyrir því að auglýsa lokunina til almennra notenda í héraðinu, svo sem á vef Reykhólahrepps,“ segir viðmælandi vefjarins. Og bætir við:

 

„Ingunn Sveinsdóttir sem fer með þessi mál hjá N1 virðist reyndar hvorki vita hvar Króksfjarðarnes er, hvaða starfsemi er þar né hvar næstu eldsneytisafgreiðslur eru, heldur segir einungis að þetta sé ákvörðun sem ekki verði haggað.“

 

Athugasemdir

Harpa Eiríksdóttir, fstudagur 14 mars kl: 17:47

Þetta er mjög slæmt fyrir starfssemina sem er í Króksfjarðarnesi og að starfsmenn hennar þurfa að horfa fram á að afsaka og á redda ferðamönnum sem hafa komið þangað í þeirri trú að fá bensín eða olíu og hafa ekki nóg á bílnum til að fara lengra. Þetta er til skammar hjá N1 - og það að vita ekki einu sinni hvar er verið að loka segir að starfsmaður er ekki að sinna vinnunni sinni.

Hlynur Þór Magnússon, umsjónarmaður Reykhólavefjarins, fstudagur 14 mars kl: 18:07

Endanlegt svar hefur nú borist frá Eggert Benedikt Guðmundssyni, forstjóra N1: „Ég harma þau óþægindi, sem þessi breyting kann að valda ykkur. Hún hefur hins vegar legið lengi í loftinu og nú er komið að því að hrinda henni í framkvæmd.“

sigurgeir jónsson., fstudagur 14 mars kl: 22:01

Þetta er að sjálfsögðu óþolandi.Íbúar sveitarfélaga eiga að sjálfsögðu að standa saman í svona tilfellum og sameinast um olíukaup frá einhverju olíufélagi sem vill hafa dælu á staðnum.Fyrirtæki hafa mikið að segja í svona málum.Stöndum saman á Landsbyggðinni.

Signý M Jónsdóttir, mnudagur 17 mars kl: 11:31

Hann "harmar þau óþægindi" þegar er slegið upp orðinu harmur í Íslenskri samheitaorðabók kemur þetta "angist, angur, böl, harmkvæli, hjartasár, hláturbann, hrelling, hryggð, hugarangur, hugarharmur, hugarhrelling, hugarkvöl, hugarvíl, mæða, raun, sorg, sorgarefni, *stríð, sút, sýting, söknuður, er hann sorgmæddur yfir þessu ? Er ekki verið að gjaldfella þetta orð þarna ? spyr sá sem ekki veit.

Skrifaðu athugasemd:


Atburðadagatal

« Nvember 2022 »
S M Þ M F F L
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30