Selurinn á myndunum var að svamla við nýja og fína hafnargarðinn á Reykhólum í dag. Hann hefur sjálfsagt verið að athuga um þá Brynjólf Smárason og Hilmar Óskarsson, sem eru að ganga frá raflögnum að garðsendaljósi og lýsingu við flotbryggjuna. Myndirnar tók Sveinn Ragnarsson á Svarfhóli.
...
Meira

Átta sóttu um stöðu verkefnastjóra Byggðasamlags Vestfjarða (BSV) um málefni fatlaðra, en Reykhólahreppur á aðild að samlaginu. Verið er að undirbúa viðtöl og standa vonir til þess að gengið verði frá ráðningu í vikunni. Stofnfundur Byggðasamlags Vestfjarða um málefni fatlaðra var haldinn í Þróunarsetrinu á Ísafirði á Þorláksmessu. Þar var samþykktur samningur um stofnun samlagsins, sem hefur yfirumsjón með málaflokknum eftir að hann færðist frá ríki til sveitarfélaga um áramótin. Verkefnastjóra BSV er ætlað að hafa umsjón og eftirlit með framkvæmd nýs þjónustusamnings málefna fatlaðra og bera ábyrgð á honum gagnvart framkvæmdastjóra og stjórn BSV.
...
Meira

Dagur leikskólans var haldinn hátíðlegur á Leikskólanum Hólabæ á Reykhólum í fyrradag. Að þessu sinni var efnt til náttfatadags og allir máttu koma með tuskudýr með sér. „Fengum ávaxtasafa, kex og poppkorn og svo héldum við dúndurball“, segir Björg Karlsdóttir leikskólastjóri. Hún sendi vefnum jafnframt fjölda mynda sem finna má undir Ljósmyndir > Myndasyrpur í valmyndinni hér vinstra megin.
...
Meira

Núverandi vefur Reykhólahrepps var opnaður 24. apríl 2008, sumardaginn fyrsta. Áður höfðu verið settar inn á vefinn fáeinar fréttir til prófunar, ásamt því sem miklu af eldri fundargerðum og ýmsu öðru hafði verið safnað inn á hann þannig að lesendur kæmu ekki að tómum kofanum. Hinn 15. ágúst 2008 var vefteljarinn Google Analytics tengdur við vefinn. Frá þeim tíma og fram til 31. janúar 2011 eru 900 dagar. Fjöldi heimsókna á vefinn á þeim tíma er 227.719 eða 253 á dag að jafnaði. Fjöldi flettinga á vefnum á þeim tíma er 789.829 eða 878 á dag að jafnaði. Ef litið er á þann tíma sem leið frá opnun vefjarins og þar til teljarinn var tengdur má ætla að heimsóknir frá upphafi og til nýliðinna mánaðamóta séu um 250.000 og flettingar um 880.000.
...
Meira

Réttindanám í vélgæslu í samstarfi Fræðslumiðstöðvar Vestfjarða og Guðmundar Einarssonar kennara á Ísafirði er áformað í Tjarnarlundi í Saurbæ í sumar. Námskeiðið veitir rétt til að vera vélavörður á skipum 12 metrar að skráningarlengd og styttri, með vélarafl 750 kW eða minna (skírteini: Smáskipa vélavörður SSV). Að loknu 7 eininga viðbótarnámi sem skilgreint er í námskrá fást réttindi til að vera vélavörður á skipi með 750 kW vél og minni (skírteini: Vélavörður VV) og yfirvélstjóri á skipi með 750 kW vél og minni og 24 metrar og styttri að skráningarlengd að loknum fjögurra mánaða siglingatíma sem vélavörður (skírteini: Vélavörður VVY).
...
Meira

Karl Björnsson, framkvæmdastjóri Sambands íslenskra sveitarfélaga, segir að sóknaráætlunin Ísland 2020 feli í sér tækifæri sem ekki hafa boðist sveitarfélögum í langan tíma. Í raun sé um að ræða eitt stærsta skref sem stigið hefur verið í byggðamálum á Íslandi í áratugi. Sóknaráætlunin Ísland 2020 var samþykkt af ríkisstjórninni fyrir skömmu. „Í sóknaráætlunum fyrir hvern landshluta skal taka mið af þeirri svæðaskiptingu sem ákveðin var í undirbúningsvinnunni, sem miðar við núverandi starfssvæði landshlutasamtaka sveitarfélaga“, segir Karl í forystugrein tímaritsins Sveitarstjórnarmála.
 ...
Meira

Stjórn samtakanna Landsbyggðin lifi skorar á Alþingi og ríkisstjórn að binda í lög hvaða opinber þjónusta skuli vera á hverju landsvæði fyrir sig, með það að markmiði að þjónustustig sé ekki skert á þann hátt að fólki sé mismunað eftir landsvæðum. Einnig er mikilvægt að rekstrarhagræðing skili raunverulegum sparnaði en felist ekki einungis í flutningi á þjónustu og þar með kostnaði milli landsvæða og standa þannig vörð um hagsmuni íbúa landsins alls til framtíðar, hvort sem í hlut eiga fámennar byggðir eða þéttbýli.
...
Meira

Vegna veðurs og færðar komst hinn nýi félagsmálastjóri Reykhólahrepps og Stranda, Hildur Jakobína Gísladóttir, ekki til viðveru á Reykhólum í dag, fimmtudag, eins og til stóð. Hins vegar er nú áformað að hún verði á Reykhólum á mánudag.
...
Meira

Í tilefni af síðustu fréttinni hérna á undan, þar sem auglýst er eftir umsóknum um styrki úr fornleifasjóði, er sett hér inn fréttagrein sem undirritaður skrifaði umbeðinn haustið 2006 fyrir eitthvert blað, sennilega Morgunblaðið, og fann geymda í tölvunni. Jafnframt tók undirritaður þá myndir frá fornleifagrefti á Hofsstöðum og fylgir hér ein þeirra.
...
Meira

Fornleifasjóður auglýsir eftir umsóknum um styrki úr sjóðnum skv. 24. gr. þjóðminjalaga nr. 107/2001. Úthlutunarreglur sjóðsins er að finna hér á vef mennta- og menningarmálaráðuneytis. Veittir verða styrkir til verkefna sem stuðla að varðveislu og rannsóknum á fornleifum og forngripum. Á fjárlögum 2011 eru 17,2 milljónir til ráðstöfunar. Umsóknarfrestur er til 1. mars 2011.
...
Meira