Flutningaskipið Bona Safir lagðist að bryggju í Reykhólahöfn í fyrrakvöld. Erindið var að lesta þörungamjöl til útflutnings. Skipið er í eigu sama fyrirtækis og á Þörungaverksmiðjuna á Reykhólum, sem stendur rétt við Reykhólahöfn. Það er að jafnaði notað sem þaraflutningaskip á vesturströnd Noregs. Bergsveinn Reynisson á Gróustöðum fékk að nota ferð skipsins frá Noregi og í lestinni var að heita má heil verksmiðja til ræktunar og vinnslu á kræklingi. Til að vinna við búning verksmiðjunnar til flutnings fór Jón Ingiberg sonur Bergsveins til Noregs um daginn. Eins og Bergsveinn segir: „Hann var úti í Noregi um verslunarmannahelgina á meðan aðrir voru úti í Vestmannaeyjum.“ Bergsveinn Reynisson hefur lagt stund á kræklingarækt frá 2007, aðallega í Króksfirði en einnig í Gilsfirði.
...
Meira

Verslunin Hólakaup á Reykhólum tók miklum stakkaskiptum fyrir skömmu þegar húsið var málað að utan, bæði veggir og þak. Áður var húsið dökkbrúnt en núna er það ljósgrátt. Þessa dagana er sami málningarverktaki að undirbúa málningu á þaki Reykhólakirkju auk þess sem hann hefur fengist við fleiri verkefni á Reykhólum að undanförnu.
...
Meira

Á fyrsta fundi nýrrar hreppsnefndar Reykhólahrepps í dag var Gústaf Jökull Ólafsson endurkjörinn oddviti til eins árs. Andrea Björnsdóttir var kosin varaoddviti til sama tíma. Af fimm hreppsnefndarmönnum gáfu aðeins tveir kost á sér við nýliðnar kosningar, þeir Gústaf Jökull og Sveinn Ragnarsson, og voru þeir báðir endurkjörnir. Nýir hreppsnefndarmenn eru Andrea Björnsdóttir, Eiríkur Kristjánsson og Ásta Sjöfn Kristjánsdóttir. Auglýst verður eftir sveitarstjóra en síðasti vinnudagur Óskars Steingrímssonar fráfarandi sveitarstjóra var á föstudag. Einnig verður auglýst eftir skrifstofustjóra hreppsins en Eygló Kristjánsdóttir hefur látið af því starfi vegna þess að hún hefur verið ráðin sveitarstjóri í Skaftárhreppi.
...
Meira

Veigamikil og fjölbreytt dagskrá verður á sunnudag í Ólafsdal við Gilsfjörð. Ólafsdalshátíðin er að þessu sinni haldin í minningu þess að 130 ár eru liðin frá stofnun fyrsta búnaðarskóla hérlendis. Aðgangur að viðburðum á dagskránni er ókeypis, en hún stendur frá kl. 13 til kl. 17. Hana má sjá hér í einstökum atriðum (pdf). Tekið er fram að netsamband er enn stopult í Ólafsdal og því eru gestir beðnir að hafa með sér lausafé hafi þeir hug á að versla á markaði eða taka þátt í happdrætti.
...
Meira

Hin árlega messa í Flateyjarkirkju á Breiðafirði verður haldin á morgun, laugardaginn 7. ágúst kl. 14. Undirleikari í ár er Viðar Guðmundsson og kór Reykhólaprestakalls mun leiða sönginn. Prestur er sr. Elína Hrund Kristjánsdóttir sóknarprestur.
...
Meira

Í dag og á morgun (föstudag og laugardag) verður BYMOS - Byggingavöruverslun Mosfellsbæjar með efni og skreytingar til sölu fyrir Reykhóladaginn á góðu verði hjá Ingibjörgu Þór að Hellisbraut 38 á Reykhólum. Skreytingarnar eru í samræmi við þá litaskiptingu byggðarlagsins sem ákveðin hefur verið eða í litunum fjólublátt, appelsínugult og rautt.
...
Meira

Reykhólahreppur óskar eftir að ráða starfsmann til að sinna heimilishjálp hjá einum eldri borgara í sveitarfélaginu. Um er að ræða vikulegt hlutastarf. Nánari upplýsingar á skrifstofu Reykhólahrepps.
...
Meira

Þær systur á Stað á Reykjanesi, Védís Fríða (átta ára) og Aníta Hanna (fimm ára) brugðu sér að veiða í ánni á Stað, sem raunar var lítið annað en lækur eftir langvarandi þurrka í sumar. Veiðarfærin voru lítil barnaveiðistöng og spúnn, en ekki komu þær systur tómhentar heim því að þær lönduðu 900 gramma bleikju. Þær eru reyndar búnar að vera að veiða þorsk og makríl en hafa alltaf fengið nokkuð mikla hjálp þangað til þær skelltu sér í þetta og kláruðu með glæsibrag. Enda voru litlu konurnar sem komu heim með veiðina að springa af stolti.
...
Meira

Þjóðskáldið séra Matthías Jochumsson er eflaust þekktasti sonur Reykhólasveitar. Síðar á þessu ári eru liðin 175 ár frá fæðingu hans í Skógum við Þorskafjörð. Á morgun, laugardaginn 31. júlí, verður af þessu tilefni haldið málþing að Nýp á Skarðsströnd. Þar munu Kristján Árnason, þýðandi og bókmenntafræðingur, og Þórunn Erlu-Valdimarsdóttir, rithöfundur, fjalla um skáldið og verk hans. Kristján flytur erindi um þýðingar og skáldskap séra Matthíasar en Þórunn fjallar um æviferil skáldsins og bernsku í Skógum. Fyrir nokkrum árum ritaði Þórunn ævisögu séra Matthíasar, eins og kunnugt er. Að loknum erindum verða almennar umræður. Málþingið hefst kl. 15 og ráðgert er að það standi í tvo tíma.
...
Meira

Kosið var til sveitarstjórnar Reykhólahrepps í dag en kosningarnar 29. maí voru á sínum tíma úrskurðaðar ógildar. Aðalmenn í nýrri hreppsnefnd til fjögurra ára samkvæmt kosningunum í dag eru í þessari röð: Andrea Björnsdóttir (106 atkvæði), Eiríkur Kristjánsson (103 atkvæði), Ásta Sjöfn Kristjánsdóttir (95 atkvæði), Sveinn Ragnarsson (82 atkvæði), Gústaf Jökull Ólafsson (72 atkvæði).
...
Meira