Karlsey BA við bryggju í Reykhólahöfn í nafngjafanum Karlsey 31. júlí 2008. Reykhólar og Reykjanesfjall í baksýn.

Inni í höfninni 31. júlí 2008.

Utan á kantinum 23. júlí 2008.

Seint í maí 2009.

Karlsey BA ofarlega til vinstri í mynni Berufjarðar milli Hrafnaness og Borgarlands. Nær hægra megin eru sláttuprammar og trossa af þangpokum. Barmar í forgrunni.

Komin með fullfermi af þangpokum í mynni Berufjarðar.

Haldið af stað til hafnar með farminn. Bjartmarssteinn (Pjattarsteinn) fyrir handan.

Karlsey og Grettir í Reykhólahöfn á komudegi Grettis 15. maí 2011.

Ekki var neinn gleðisvip á Karlseynni að sjá daginn þegar Grettir kom.

« 1 af 9 »

Þörungaverksmiðjan hf. á Reykhólum hefur selt flutningaskipið Karlsey BA í brotajárn. Ráðgert er að skipið gamla kveðji sína heimahöfn - Reykhólahöfn í Karlsey - mjög fljótlega eftir áramótin. Kaupandinn er Jón P. Pétursson í Hafnarfirði fyrir hönd endurvinnslustöðvarinnar Van Heygen Recycling í borginni Gent í Belgíu, þar sem skipið mun enda ævi sína í stálbræðsluofnum. Vegferð Karlseyjar lýkur ekki svo mjög fjarri þeim stað þar sem hún hófst, því að skipið var smíðað í bænum Hoogezand í Hollandi. „Nei, ég sakna hennar ekkert“, segir Gylfi Helgason á Reykhólum, sem var skipstjóri á Karlsey í fjórðung aldar og stýrimaður nokkur ár þar á undan.

Kveikt verður í áramótabálkestinum á Reykhólum á venjulegum stað neðan við þorpið kl. hálfníu á gamlárskvöld - þó með fyrirvara um bæði vindáttina og vindstyrkinn. Flugeldasýning Björgunarsveitarinnar Heimamanna byrjar svo um korteri seinna. Stíf suðvestanátt er óheppileg hvað brennuna varðar því að þá leggur svæluna yfir þorpið. Eins og sakir standa núna síðdegis á næstsíðasta degi ársins eru horfur þó allsæmilegar. Gert er ráð fyrir fremur hægri suðlægri átt - en skjótt skipast veður í lofti stundum. Þyki ekki ráðlegt að kveikja í kestinum að þessu sinni verður brennunni og flugeldasýningunni frestað fram á þrettándann. Ef frestun verður ákveðin einhvern tímann á morgun verður strax greint frá því hér á vefnum.

Fjöldi mynda sem birst hafa með fréttum á Reykhólavefnum á árinu sem er að kveðja er kominn inn í Ljósmyndir > Myndasyrpur > Svipmyndir ársins 2011 í valmyndinni til vinstri. Með því að fletta þeim rifjast efalítið sitthvað upp af viðburðum ársins enda er hér um eins konar annál að ræða. Líkt og þar kemur fram er auðvelt að finna þær fréttir sem myndirnar fylgdu, fyrir þá sem hafa áhuga, og þá líka í mörgum tilvikum fleiri myndir með hverri frétt.

Björgunarsveitin Heimamenn í Reykhólahreppi hefur ekki setið auðum höndum á árinu sem er að kveðja fremur en endranær. Útköllin hafa verið um 20 og sem betur fer aðallega vegna aðstoðar á vegum. Einnig unnu menn sveitarinnar í þrjá daga við öryggisgæslu á tökustað við Staðarhöfn þar sem verið var að kvikmynda og fengu það vel launað. Landróverinn góði hefur verið í breytingum, búið er að hækka hann upp og gera ýmislegt fleira. Hægt verður að skoða djásnið við hús Heimamanna við Suðurbraut á Reykhólum á morgun og gamlársdag þegar flugeldasalan stendur yfir.

Hið árvissa jólaball Kvenfélagsins Kötlu í Reykhólahreppi verður í íþróttahúsinu á Reykhólum á föstudag, daginn fyrir gamlársdag. Það hefst kl. 16 og stendur í tvo tíma eða þar um bil. Gengið verður kringum jólatré (ekki einiberjarunn) og dansað og sungið og farið í leiki og jólasveinar koma í heimsókn. Steinunn Ólafía Rasmus spilar undir dansinum og söngnum. Ballið er öllum opið, börnum og fullorðnum, konum og köllum. Enginn aðgangseyrir en veitingar verða í boði.

« 1 af 4 »

Núna kringum áramótin sýnir Leikfélag Hólmavíkur leikritið Gott kvöld eftir Áslaugu Jónsdóttur. Þetta er barnaleikrit með söngvum fyrir gesti á öllum aldri og leikarar alls 22, flestir á grunnskólaaldri en reynsluboltar úr félaginu taka einnig þátt í sýningunni. Í leikritinu segir frá hugmyndaríkum strák sem er aleinn heima um kvöld með bangsa sér til halds og trausts þegar pabbi skreppur að sækja mömmu. Fjölmargar furðuskepnur koma í heimsókn, meðal annarra hungurvofa og hrekkjusvín, hræðslupúki og letihaugur, þannig að stráksi og bangsi hafa í nógu að snúast. Leikstjóri er Kristín Sigurrós Einarsdóttir, formaður Leikfélags Hólmavíkur.

Guðný Sæbjörg og Mugison.

Aðstandendur hátíðarinnar Aldrei fór ég suður 2011. Mugipapa lengst til hægri.

« 1 af 2 »

Mugison hefur heldur betur verið í fréttum að undanförnu. Reyndar ekki að ástæðulausu og hreint ekki í fyrsta sinn. Þegar Guðný Sæbjörg Jónsdóttir á Reykhólum var stödd á Ísafirði fyrir jólin fór hún í búð til að kaupa nýja diskinn hans. Þá hittist svo á, að Mugison var sjálfur í búðinni ýmist að spila og syngja eða árita diskinn fyrir alla sem vildu. Myndin var tekin þegar listamaðurinn var búinn að árita diskinn sem Guðný keypti af honum til að gefa Hrefnu systur sinni í jólagjöf.

Í fjárhagsáætlun Reykhólahrepps og stofnana hans fyrir árið 2012, sem var samþykkt við síðari umræðu 15. desember, eru engar verulegar breytingar á heildarniðurstöðum frá endurskoðaðri fjárhagsáætlun fyrir þetta ár. Gert er ráð fyrir óbreyttu útsvarshlutfalli svo og óbreyttri álagningu fasteignagjalda en sorpgjöld hækka um 10%. Laun og launatengd gjöld hækka mikið milli ára en framlag úr Jöfnunarsjóði hækkar um rúm 15%. Helstu framkvæmdir á komandi ári verða á sorpsvæðum hreppsins og haldið verður áfram viðhaldsvinnu við húsnæði grunnskóla og leikskóla.

Nýi garðurinn sem ver höfnina á Reykhólum fyrir norðaustanáttinni.

« 1 af 2 »

Í drögum að nýrri fjögurra ára samgönguáætlun sem nú liggur fyrir Alþingi er gert ráð fyrir fjárveitingu árið 2013 upp á 20,1 millj. króna til dýpkunar í Reykhólahöfn og til þess að útbúa þar aðstöðu fyrir smábáta. Samkvæmt frumáætlun Siglingastofnunar er kostnaður við dýpkunina 18 milljónir og kostnaðurinn við gerð flotbryggju fyrir smábáta 10 milljónir eða samtals 28 milljónir til verkanna beggja. Þar af myndi ríkið greiða 90% en Reykhólahreppur 10%. Í áætluninni er 25,5% vsk. meðtalinn en upphæðin fer niður í 22,3 milljónir eftir að búið er að draga hann frá. Framlag ríkisins er 90% af þeirri upphæð eða 20,1 millj. króna.

Sr. Elína Hrund Kristjánsdóttir.

Hátíðarmessan sem átti að vera í Gufudalskirkju fellur niður vegna ófærðar. Að öðru leyti er sr. Elína Hrund sóknarprestur á Reykhólum að venju með helgihald á mörgum stöðum í hinu víðlenda prestakalli sínu um jólin. Guðsþjónusturnar og helgistundirnar frá aðfangadegi  og fram á annan í jólum eru þessar: