Guðný Sæbjörg Jónsdóttir á Reykhólum og Örn Elías (Mugison) á góðri stund.

Vikublaðið Bæjarins besta og fréttavefurinn bb.is á Ísafirði gengust núna í ellefta sinn fyrir kjöri Vestfirðings ársins. Heiðurinn hlaut Örn Elías Guðmundsson tónlistarmaður, betur þekktur sem Mugison. Þetta er í fyrsta sinn sem sami maður hlýtur þennan titil tvisvar, en áður var Mugison kjörinn Vestfirðingur ársins 2004. Stjarna hans hefur aldrei risið eins hátt og núna undir lok nýliðins árs þegar hann gaf út hljómdiskinn Haglél sem selst hefur í tugþúsundum eintaka. Til þess að þakka fyrir sig hélt Örn Elías fjölmarga tónleika víðs vegar um landið auk þrennra tónleika í Hörpu þar sem þúsundir fólks hlustuðu á hann án endurgjalds.

Frá smábátahöfninni á Hólmavík.

Katrín Jakobsdóttir menntamálaráðherra ávarpar Menntaþing á Ströndum sem haldið verður í félagsheimilinu á Hólmavík kl. 16.30 í dag, fimmtudag. Þingið er öllum opið og fólk í grannhéruðum boðið velkomið. Ýmsir sérfræðingar flytja erindi um skólastarf og menntun fólks á öllum aldri og síðan verða pallborðsumræður. Tónskólinn á Hólmavík annast tónlistarflutning og menntastofnanir í Strandabyggð kynna starfsemi sína.

Eysteinn G. Gíslason. Myndin er tekin árið 1998.

Eysteinn G. Gíslason (Eysteinn í Skáleyjum) var á sínum tíma þjóðkunnur hagyrðingur og lausavísur hans flugu víða. Jófríður Leifsdóttir systurdóttir hans er að hefjast handa við að safna saman kveðskap frænda síns og vonast til að finna sem allra mest af því sem eftir hann liggur. Sjálfur er Eysteinn kominn á níræðisaldur og búsettur á Dvalarheimilinu Barmahlíð á Reykhólum seinustu árin. Eins og svo margt fólk sem komið er á þennan aldur hefur hann tapað minninu þannig að ekki þýðir lengur að leita til hans í þessu efni.

Séð yfir Svefneyjar. Ljósmynd og höfundarréttur: Mats Wibe Lund.

Svefneyjar á Breiðafirði, sem tilheyra Reykhólahreppi, eru til sölu. Þar eru tvö nýuppgerð íbúðarhús, allnokkur útihús og friðaður torfkofi, Ranakofinn. Svefneyjar eru fornfræg hlunnindajörð rétt austur af Flatey og skilur Flateyjarsund á milli. Þær eru skammt suðvestur af Hvallátrum og þar handan við eru Skáleyjar. Heimaeyjan í Svefneyjum er litlu minni en Flatey eða um hálfur annar kílómetri á lengd og allt upp í hálfan kílómetra á breidd. Fjöldi annarra smærri eyja, hólma og skerja tilheyrir Svefneyjum.

Erlingur við gamla góða Benzann.

Framan á bílnum er snjóplógur ...

... undir honum er tönn ...

... og að aftan er hálkuvarnardreifari.

« 1 af 4 »

Erlingur Jónsson vörubílstjóri á Reykhólum hefur í samræmi við tíðarfarið átt annríkara við snjóruðing á þjóðvegum á þessum vetri en í mjög mörg ár á undan. „Þetta hefur ekki verið svona síðan fyrir Gilsfjarðarbrú“, segir hann, en þverun fjarðarins komst í gagnið í nóvember árið 1998. Svæðið sem Erlingur þjónar er austurhluti hins víðlenda Reykhólahrepps eða allt frá Gilsfirði á austurmörkum og vestur í Kollafjarðarbotn og hefur snjóruðningurinn verið í hans höndum í fjórðung aldar. Þegar ryðja þarf leggur hann venjulega af stað milli hálfsex og sex á morgnana og samkvæmt núgildandi reglum er rutt fimm daga vikunnar.

Á fundi skipulags-, bygginga-, húsnæðis- og hafnarnefndar Reykhólahrepps í gær var tekin fyrir umsókn frá Áhugamannafélagi um bátasafn Breiðafjarðar um lóð við Reykhólahöfn undir 540 fermetra bátaskýli. Erindið var afgreitt með þeim hætti, að samþykkt var að fara í nauðsynlega undirbúningsvinnu vegna lóðarinnar en afgreiðslu umsóknarinnar að öðru leyti frestað.

Sveitarfélagaskipan. Kort af vef Landmælinga Íslands (lmi.is).

Ósamkomulag er meðal eigenda Atvinnuþróunarfélags Vestfjarða (AtVest) vegna tillögu Fjórðungssambands Vestfirðinga um slit á félaginu. Tillöguna átti að bera upp á hluthafafundi sem halda átti í gær en var frestað um hálfan mánuð. Tillaga þessi felst í því að Fjórðungssambandið yfirtaki alla starfsemi AtVest og var miðað við að sameining tæki gildi um síðustu áramót. Hluthafar í AtVest eru liðlega hundrað og þeirra stærstir Byggðastofnun, Fjórðungssambandið (og þar með Reykhólahreppur) og AtKonur.

Snæbjörn ásamt einum félaga sínum í sumarferð Breiðfirðingafélagsins.

„Nei, við höfum ekkert tilboð fengið“, segir Snæbjörn Kristjánsson, formaður Breiðfirðingafélagsins, aðspurður hvort falast hafi verið eftir léninu bf.is fyrir hinn nýja flokk Guðmundar Steingrímssonar, Bjarta framtíð. Fjallað var um þetta á vefmiðlinum Pressunni fyrir helgi. Þar kom fram, að Snæbjörn hefði tekið því dræmt þegar hann var spurður hvort lénið væri til sölu. Það yrði samt skoðað ef til kæmi. „Við myndum í rauninni ekki vilja láta lénið af hendi“, segir Snæbjörn í samtali við Reykhólavefinn, „en ég vildi svo sem ekki vera að loka á neitt þegar Pressan hafði samband við mig.“

Tumi (til hægri) og branduglan.

Jón Atli.

Eiríkur.

« 1 af 3 »

Þrír menn á Reykhólum fóru í gær í hina árlegu fuglatalningu, þeir Tómas Sigurgeirsson, Jón Atli Játvarðarson og Eiríkur Kristjánsson. „Það var óvenjumikið af fugli en oft hafa tegundirnar verið fleiri. Núna sáum við tuttugu og eina tegund en þær hafa stundum verið á bilinu 25 til 28“, segir Tómas. „Oft höfum við séð toppönd, tjald, auðnutittling, teistu, smyril og fálka en þessar tegundir vantaði núna.“ Sérstaklega sáu þeir félagar mikið af æðarfugli eða kringum tvö þúsund og síðan komu á fjórða hundrað stokkendur og eitthvað svipað af snjótittlingum.

« 1 af 6 »

„Þetta hefur gengið fínt og verkefnin verið nóg“, segir Brynjólfur Smárason verktaki á Reykhólum (Bolli frá Borg í Reykhólasveit). Eftir hrunið hafa almennt orðið mikil umskipti hjá verktökum, samdráttur og jafnvel algert verkefnaleysi þar sem áður var bullandi góðæri. Stórveldi í þessum geira hafa skroppið saman í nánast ekki neitt og sum farið í þrot eins og t.d. vestfirska fyrirtækið KNH sem var með stór verkefni hér og þar um landið. Litlu verktakarnir hafa sumir sloppið miklu betur og Brynjólfur kvartar ekki.