Frá opnunardeginum 1. desember.

Síðustu mánuði hefur Héraðsbókasafn Reykhólahrepps verið að koma sér fyrir í gamla íþróttasalnum í Reykhólaskóla og var opnað þar 1. desember. Margt er þó enn ógert við að ganga frá öllum þeim bókum sem ratað hafa á safnið. Geiradalsbókasafn hefur nú verið flutt úr Vogalandi í Reykhólaskóla og mikil vinna er eftir við að merkja bækur þess, plasta og skrá. Einnig á eftir að skrá og merkja bækur sem gefnar hafa verið á safnið. Óskað er eftir sjálfboðaliðum til aðstoðar við þessa vinnu.

Álagning gjalda í Reykhólahreppi 2012 var ákveðin á fundum hreppsnefndar í desember og núna í janúar. Þar er um að ræða útsvarsprósentu svo og fasteignagjöld (fasteignaskatt, holræsagjald, vatnsgjald, lóðaleigu og sorpeyðingargjald) ásamt gjalddögum. Jafnframt reglur um afslátt af fasteignagjöldum elli- og örorkulífeyrisþega. Þessar upplýsingar er að finna í einu pdf-skjali í reitnum Tilkynningar neðst til hægri á síðunni og líka með því að smella hér.

Handverksfélagið Assa í Reykhólahreppi byrjar enn á ný með Opnu húsin sín í Vogalandi í Króksfjarðarnesi klukkan 20 í kvöld. Þau verða síðan annað hvert þriðjudagskvöld fram á vor. Allir eru velkomnir og ekki þarf að vera skráður félagi. Þarna er tilvalið að koma með prjónana, saumadótið, skrappið og kortin eða bara til að spjalla. Yfirleitt stendur þetta í tvo til tvo og hálfan tíma og öllum er frjálst að koma og fara hvenær sem er.

Fæst m.a. hjá Karli á Kambi.

Út er komið fyrir skömmu þriðja bindið í stórvirki Útgáfufélags Búnaðarsambands Vestfjarða um byggðir og fólk á Vestfjarðakjálkanum. Það nefnist Vestfjarðarit III, Fólkið, landið og sjórinn, Vestur-Barðastrandarsýsla 1901-2010. Ritstjóri er Birgir Þórisson frá Hvalskeri við Patreksfjörð. Hér er á ferðinni mikil fróðleiksnáma og gott uppsláttarrit fyrir alla sem hafa áhuga á liðnum tíma og fólki sem horfið er af heimi. Einnig nær ritið til nútíðar – stöðu sveita og þéttbýlis í Vestur-Barðastrandarsýslu. Þetta bindi er tæplega 600 blaðsíður. Fyrir utan allan annan fróðleik, svo sem um atvinnuhætti, þéttbýli, kaupfélög, prestaköll, heilbrigðismál, skóla og samgöngur, er greint frá öllum sveitabæjum í sýslunni á þessum tíma og fólkinu sem þar bjó hverju sinni, foreldrum þess og afkomendum. Urmull ljósmynda er í ritinu.

Gústaf Gústafsson forstöðumaður Markaðsstofu Vestfjarða.

Námskeið um markaðssamskipti verður haldið í Reykhólaskóla þriðjudaginn 7. febrúar kl. 13-17. Kennari er Gústaf Gústafsson forstöðumaður Markaðsstofu Vestfjarða í samvinnu við Fræðslumiðstöð Vestfjarða. Tilgangur námskeiðsins er að kynna helstu áherslur og leikreglur í markaðsmálum og almannatengslum. Markmiðið er að auka skilning á þeim leiðum sem best nýtast auk þess að fjalla um verkefni sem hafa náð framúrskarandi árangri hér á landi.

« 1 af 4 »

Ærin Tímaskekkja á Bakka í Geiradal ber nafnið sitt með rentu. Sjálf er hún í heiminn borin í byrjun mars fyrir tæpum þremur árum eða rúmlega tveimur mánuðum áður en sauðburður hefst að jafnaði. Hún bar lambakónginum Lukku-Láka núna þann 7. janúar og var því enn lengra frá almennum sauðburðartíma en þegar hún sjálf sá dagsins ljós í fyrsta sinn. Ennþá ólíklegra er þetta þegar ærin hefur einnig borið vorið áður en Tímaskekkja bar gimbrarlambi 28. apríl og var þannig aðeins með fyrra fallinu í það skiptið. Fyrirsætan á myndinni ásamt þeim Tímaskekkju og Lukku-Láka er Ásgerður Ásta Kjartansdóttir á Bakka, dóttir Ebbu Gunnarsdóttur og Kjartans Daníelssonar búenda þar.

Í Reykhólahreppi er sveitarstjórinn kona, allir starfsmennirnir á skrifstofu hreppsins eru konur. Oddviti hreppsins er kona. Presturinn er kona. Skólastjóri Reykhólaskóla er kona. Skólastjóri leikskólans er kona. Forstjóri Dvalarheimilisins Barmahlíðar er kona. Forstöðumaður Grettislaugar og tjaldsvæðis hreppsins á Reykhólum er kona. Félagsmálastjórinn er kona. Ferðamálafulltrúinn er kona. Formaður leikfélagsins er kona ...

Ómar Már Jónsson, sveitarstjóri í Súðavík, sem á sæti í starfshópi um breytingar á niðurgreiðslum á raforku til húshitunar, segir að ekki sé annað að heyra en samhljómur sé innan iðnaðarráðuneytisins með tillögur hópsins. Núna í desember skilaði hópurinn skýrslu með tillögum til ráðuneytisins. „Eins og staðan er í dag er mikið lagt upp úr því að árið í ár verði notað til að afgreiða tillögurnar, og ef þær verða samþykktar, þá koma þær til framkvæmda á næsta ári.“

Núna liggur fyrir allt sem máli skiptir varðandi þorrablótið hefðbundna sem haldið verður í íþróttahúsinu á Reykhólum laugardagskvöldið 21. janúar. Skógarpúkarnir gamalreyndu leika fyrir dansi en hljómsveitina skipa þrír menn brottfluttir úr Reykhólahreppi, bræðurnir Aðalgeir og Ólafur Bragi Halldórssynir frá Gilsfjarðarmúla og Óskar Valdimarsson frá Reykhólum. Á borðum verður fjölbreyttur úrvals þorramatur eins og venjulega og þorrablótsannállinn verður á sínum stað - raunar er óþarfi að nefna svo sjálfsagða hluti. Aldurstakmark á blótinu er 16 ár. Skipað verður til sætis.

Gústaf Jökull og blásarinn. Traktorinn er með drif á öllum og keðjur á öllum.

Snjóþyngslin í vetur hafa kallað á mikla vinnu í Reykhólahreppi eins og annars staðar. Gústaf Jökull Ólafsson á Reykhólum, sem er með kúabú á Miðjanesi, fékk fyrir stuttu snjóblásara aftan á dráttarvél svo að mjólkurbíllinn komist upp heimreiðina en þar er mikil snjósöfnun. Núna er bíll Mjólkursamlagsins aðeins með drifi að aftan en ekki á öllum eins og áður tíðkaðist og þess vegna þarf að ryðja vel alveg heim á hlað á bæjum. „Það er víða ótrúlega mikill snjór“, segir Gústi.