Þórarinn Ólafsson var á þorrablóti Reykhólahrepps og tók svipmyndir eins og svo oft áður við ýmis tækifæri. Þær má að venju finna undir Ljósmyndir > Myndasyrpur í valmyndinni hér vinstra megin. Enda þótt blótið hafi verið haldið á öðrum degi þorra var þetta samt ekki fyrsta blótið á þessu ári hjá sumum sem þarna voru. Réttri viku fyrr eða nærri viku fyrir þorrabyrjun var sameiginlegt þorrablót Lions haldið í Búðardal. Ástæðan er sú, að annars hefðu fleiri en eitt blót lent á einhverri þorrahelginni í Dölunum.

Sumir flagga sinni nekt ...

Hér á vefnum var fyrir skömmu spurst fyrir um kveðskap eftir Eystein G. Gíslason (Eystein í Skáleyjum). Jófríður Leifsdóttir systurdóttir Eysteins er að hefjast handa við að safna saman kveðskap frænda síns og vonast til að finna sem allra mest af því sem eftir hann liggur. Nokkru fyrir áramót var allvæn syrpa af limrum Eysteins birt hér á síðunni Gamanmál af ýmsu tagi (valmyndin vinstra megin). Syrpan hefur núna á rúmum mánuði verið „opnuð“ 785 sinnum, sem verður að teljast ekki lítið. Núna hafa verið settar þar inn vísur og texti af handskrifuðu blaði Eysteins, þar sem fjallað er um myndir af fáklæddu fólki sem hanga í stigagangi Barmahlíðar á Reykhólum, auk vísu um mynd í eigu Jóns Atla Játvarðarsonar á Reykhólum. Svavar Garðarsson smiður og Eysteinn kveðast á um myndirnar af þeim fáklæddu.

Þórisstaðir eru vestan Þorskafjarðar rétt þar sem farið er upp á Hjallaháls.

Íbúafundur til kynningar á skipulagi fyrir frístundabyggð í landi jarðarinnar Þórisstaða í Þorskafirði verður haldinn á skrifstofu Reykhólahrepps mánudaginn 30. janúar milli kl. 12 og 16. Þar munu sveitarstjóri og skipulagsfulltrúi kynna lýsingu á breytingum á aðalskipulagi Reykhólahrepps 2006-2018 og jafnframt lýsingu á nýju deiliskipulagi í landi Þórisstaða. Breytingin felst í því að skilgreina þrjú svæði fyrir frístundabyggð þar sem fyrirhuguð uppbygging gerir ráð fyrir 10-15 nýjum lóðum í landi Þórisstaða.

Ein mynda Sveins á Svarfhóli af melrakkatraðkinu torræða.

„Þar sem sporin skiptast í tvennt sést að „göngulagið“ er ólíkt, sem gæti bent til að hér séu tvö misstór dýr á ferð en einnig gæti verið að um eitt dýr sé að ræða sem gengur fram og til baka og þá á ólíkum hraða. Ég hef heyrt frásagnir af tófusporum sem „hætta“ líkt og dýrið hafi lyft sér upp til flugs en ekki áður séð spor sem kvíslast í tvennt eða verða að einu. Þetta er áhugavert en skýringin gæti allt eins verið einföld.“

Frá opnun bókasafnsins í nýjum húsakynnum í Reykhólaskóla í vetur.

Á Héraðsbókasafni Reykhólahrepps á Reykhólum hefur verið ákveðið að reyna nýjung sem er fyrir hendi a.m.k. á flestum bókasöfnum á höfuðborgarsvæðinu, en það er útleiga á myndefni. „Til að þessi skemmtilega hugmynd geti orðið að veruleika er leitað til sveitunga. Ef einhverjir eiga myndbönd eða DVD-diska sem þeir vilja að komist í góðar hendur og muni leiða gott af sér fyrir sveitina, þá endilega að gefa bókasafninu þetta“, segir Harpa Eiríksdóttir bókavörður.

Reykhólaskóli í forgrunni. Núna er heldur vetrarlegra. (Sjá Ljósmyndir > Ýmis myndasöfn > Árni Geirsson).

Stjórn Foreldrafélags Reykhólaskóla biður fyrir kærar þakkir til þeirra einstaklinga, fyrirtækja og félaga sem studdu kaupin á upptökuvélinni sem skólanum var afhent í vetur. Það eru (í stafrófsröð): Ebenezer Jensson, Eíríkur Snæbjörnsson (Reykskemman Stað), Hólakaup, Kvenfélagið Katla, Landsbankinn, Leikfélagið Skrugga og Lionsdeildin í Reykhólahreppi.

Hin árlega árshátíð Breiðfirðingafélagsins á þorra verður haldin í Breiðfirðingabúð við Faxafen á laugardagskvöld. Veislustjóri verður Sigurður Jökulsson á Vatni. Sýndir verða þjóðdansar og hljómsveitin Klassík (Haukur Ingibergsson & Co.) leikur fyrir dansi fram á nótt.

Eiríkur, Brynjólfur og Tumi við stýrið renna upp að Blíðunni.

Myndina tók Halldór Jóhannesson skipstjóri á skelveiðibátnum Blíðunni.

Tumi og Brynjólfur (Bolli) vel upplýstir.

« 1 af 3 »

„Okkur finnst merkilegt hvernig svartfuglinum er stöðugt að fjölga hér inn frá á veturna. Ekki eru nein fuglabjörg hérna nálægt. Honum hefur farið fjölgandi ár frá ári og hefur aldrei verið eins og núna“, segir Tómas Sigurgeirsson á Reykhólum. Þetta má ef til vill telja athyglisvert í ljósi þess að til stendur að alfriða svartfugl hérlendis. Núna einn daginn fór Tómas ásamt þeim Eiríki Kristjánssyni og Brynjólfi Smárasyni á gúmmítuðru út um Breiðafjarðareyjar til að kanna fuglalífið.

Staðarhólskirkja og félagsheimilið Tjarnarlundur á Kirkjuhóli í Saurbæ.

Fimmtugasta þorrablót Ungmennafélagsins Stjörnunnar verður haldið í Tjarnarlundi í Saurbæ laugardaginn 28. janúar. Þorrablót félagsins hafa verið haldin í félagsheimilinu Tjarnarlundi óslitið frá 1963 og hafa þau Margrét Guðbjartsdóttir í Miklagarði og Sigurður Þórólfsson í Innri-Fagradal setið öll blótin 49 sem komin eru. Húsið verður opnað kl. 20 og borðhaldið hefst kl. 20.30. Siggi frá Hólum sér um matinn en hljómsveitin Dísel leikur fyrir dansi.

Jóna Valgerður Kristjánsdóttir í Mýrartungu, formaður Landssambands eldri borgara.

Það er ótrúleg upplifun að enn skuli vera höggvið í sama knérunn og þrengt að þjónustu við veika aldraða. Þessi gjörningur mun skapa óöryggi og mikið rask meðal þessara sjúklinga og aðstandenda þeirra. Það er líka undarlegt, að á sama tíma og rannsóknir sýna að það vantar hjúkrunarrými í landinu, þá skuli eiga að leggja það niður sem fyrir er. Hver er eiginlega forgangsröðunin í opinberum fjármálum? Hver er sparnaðurinn? Þarf ekki áfram að hjúkra þessu fólki og er ekki betra að það fái að vera þar sem það hefur verið og það starfsfólk sinni umönnun þess sem hefur sérhæft sig til þess á undanförnum árum?