Þaraböð eru lítið þekkt hérlendis þótt þau séu í boði víða annars staðar í heiminum. Nú styttist hins vegar í að fólk geti skellt sér í þarabað hér á landi. Hugmyndina hafa þær Sólrún Sverrisdóttir og Svanhildur Sigurðardóttir á Reykhólum þróað, en nóg er af þaranum þar í kring. Þær fóru að gera tilraunir á eigin skinni, í bókstaflegri merkingu, með því að setja þaramjöl frá Þörungaverksmiðjunni í hitaveituvatn í heitum potti. Útkoman var, eins og Sólrún orðar það, algjör sæla....
Meira

Þeir sem hafa í hyggju að hlaða bálkesti til þess að kveikja í þeim á gamlárskvöld eða á þrettándanum, eða ætla að sækja um leyfi til sölu flugelda og til flugeldasýninga yfir hátíðarnar, skulu sækja um slík leyfi fyrir 6. desember. Vegna umsóknar um brennu, flugeldasýningu eða sölu flugelda skal tilgreina lögráða ábyrgðarmann og leggja fram vottorð frá vátryggingafélagi um ábyrgðartryggingu. Með umsókn um stóra brennu (sjá neðar) og sölu flugelda skal fylgja skriflegt starfsleyfi heilbrigðiseftirlits....
Meira

Hagnaður varð af rekstri Náttúrustofu Vestfjarða á síðasta ári. Þetta kemur fram í ársreikningi stofunnar fyrir árið 2007, sem lagður var fyrir bæjaryfirvöld í Ísafjarðarbæ í gær. Rekstrargjöld námu 45,6 milljónum króna á móti 31,7 milljónum 2006. Rekstrartekjur voru 48,2 milljónir en voru 31 milljón árið 2006. Athyglisvert má telja, að opinber stofnun af þessu tagi skuli skila hagnaði. Þar til á síðasta ári sá Bolungarvíkurkaupstaður einn um rekstur Náttúrustofunnar en þá komu Súðavíkurhreppur og Ísafjarðarbær einnig að rekstrinum....
Meira

Rjúpnaveiðitímanum lauk núna um mánaðamótin. Að þessu sinni stóð hann allan nóvembermánuð fjóra daga vikunnar og voru veiðidagarnir því átján eins og á síðasta ári. Hlutfall unga í veiðinni er svipað og þegar rjúpan er í uppsveiflu, að sögn Ólafs K. Nielsen, fuglafræðings hjá Náttúrufræðistofnun. Ólafur hefur aldursgreint vængi rjúpna sem veiðimenn hafa sent stofnuninni. Nú þegar hafa tæplega 900 vængir verið greindir og er ungahlutfallið 77%. Flestir vængir hafa borist frá Norðausturlandi, eða 436, og þar er ungahlutfallið 76%. Næst koma Vestfirðir með 254 vængi og þar er ungahlutfallið 82%. Mun færri vængir hafa borist frá öðrum landsvæðum....
Meira

Námskeið ætlað húsasmiðum og öðrum sem áhuga hafa á viðhaldi gamalla mannvirkja verður haldið á Patreksfirði í lok þessarar viku eða föstudagskvöldið 5. desember og laugardaginn 6. desember. Á námskeiðinu verður fjallað um undirstöður og burðarvirki eldri timburhúsa og farið yfir frágang bæði utanhúss og innan. Skoðuð verða gömul hús sem hefur verið gert við og hús sem þarfnast viðgerða. Einnig verður farið yfir undirbúning viðgerða og sögu og þróun húsbygginga á Íslandi. Tilgangur námskeiðsins er m.a. að efla þekkingu í heimahéraði á endurbótum gamalla húsa....
Meira

„Atvinnuþróunarfélag Vestfjarða kemur nú fram undir nýju merki. Merkið er tákn fyrir þær breytingar sem hafa fylgt í kjölfar stefnumótunar félagsins, sem hófst snemma í vor. Starfsmenn og stjórn Atvest hafa unnið að gagnrýnni naflaskoðun, endurhugsað hlutverk og markmið félagsins og sameinast um nýja framtíðarsýn. Sveitarfélög, fyrirtæki og einstaklingar hafa tekið þessum breytingum vel og stutt þá hugsun sem þær tákna", segir Þorgeir Pálsson, frkvstj. Atvest, í grein hér á vefnum undir fyrirsögninni Breytingar!

Lokaorðin eru þessi: „Um leið og Atvest þakkar Vestfirðingum góðar og sérlega jákvæðar viðtökur við nýjum áherslum og breytingum, skorum við á Vestfirðinga, sveitarstjórnir, fyrirtæki og einstaklinga að standa saman í því verkefni að koma í veg fyrir að kreppan verði stærsta afsökun síðari tíma fyrir enn frekara svelti og aðgerðaleysi gagnvart atvinnu- og menningarlífi á Vestfjörðum!"

...
Meira

Hér inn á vefinn hefur nú verið settur dálkur fyrir smáauglýsingar og annað smálegt sem fólk vill koma á framfæri við náungann. Inn í þennan dálk er farið með því að smella á Smáauglýsingar í valmyndinni hér til vinstri. Þetta er gert til reynslu fyrst um sinn til að sjá hvort einhverjir vilja notfæra sér þjónustu af þessu tagi. Reynslan sker síðan úr um framhaldið. Leiðbeiningar eru í inngangsorðum efst í dálkinum....
Meira

Birt hefur verið skýrsla um niðurstöður könnunar sem gerð var meðal ferðafólks sem lagði leið sína um Vestfjarðakjálkann á nýliðnu sumri. Lagður var fyrir ferðamenn spurningalisti þar sem meðal annars var spurt um ástæður fyrir komunni vestur, hvernig upplýsinga var aflað og hvernig þær nýttust, um þjónustu á Vestfjörðum sem ferðafólk nýtti sér og hversu ánægt það var með hana, sem og ánægju með ferðina í heild. Könnunin gefur mynd af því hverju ferðamenn hafa helst áhuga á að kynnast eða upplifa á ferð sinni um Vestfirði og hvar þeir eru líklegir til að leita sér upplýsinga. Þá er reynt að leiða í ljós hvaða þættir hafa helst áhrif á ánægju ferðafólksins....
Meira

Svæðisútvarp Vestfjarða á Ísafirði verður lagt niður um áramót og sama gildir um svæðisstöðvarnar á Akureyri og Egilsstöðum. Þetta er liður í sparnaðaraðgerðum Ríkisútvarpsins sem kynntar voru í dag. Þrátt fyrir þetta er haft eftir Óðni Jónssyni fréttastjóra RÚV í samtali við mbl.is, að ekki sé hægt að líta svo á, að verið sé allt að því að leggja svæðisútvörpin niður, heldur þvert á móti. Verið sé að hætta með svæðisbundnar útsendingar, en fólkinu sem verði eftir verði ætlað að setja inn fréttir á landsrásir RÚV. Hvað sem þessari túlkun fréttastjórans líður, þá blasir við, að Svæðisútvarp Vestfjarða verður lagt niður. Horfið verður til þess sem var fyrir stofnun þess, en þá var um árabil starfandi fréttamaður á Ísafirði, sem annaðist einnig dagskrárgerð.

...
Meira

Atvinnuþróunarfélag Vestfjarða ásamt aðilum frá ferðaþjónustunni, verslunum, veitingahúsum, framleiðendum og bændum hefur að undanförnu unnið að verkefni er snýr að matvælaframleiðslu í fjórðungnum og matartengdri ferðaþjónustu. Eitt af markmiðum verkefnisins er að gera vestfirsk matvæli sýnileg og aðgengileg fyrir bæði heimamenn og ferðamenn. Hannað verður vörumerki sem mun einkenna vestfiskar afurðir og mun verða notað í allri kynningu og markaðssetningu. Svipuð verkefni hafa áður verið unnin hérlendis. Dæmi um slíkt er Matarkistan Skagafjörður....
Meira