Guðmundur Einarsson kennari á Ísafirði heldur vélgæslunámskeið í Tjarnarlundi í Saurbæ vikuna 15.-23. júní (frí 17. júní) ef sjö eða fleiri þátttakendur fást. Námskeiðið veitir rétt til að vera vélavörður á skipum sem eru 12 metrar og styttri að skráningarlengd og með vélarafl 750 kW eða minna. Að loknu 7 eininga viðbótarnámi, sem skilgreint er í námskrá, öðlast viðkomandi rétt til að vera vélavörður á skipum með 750 kW vél og minni og yfirvélstjóri á skipum með 750 kW vél og minni, sem eru 24 metrar og styttri að skráningarlengd, að loknum fjögurra mánaða siglingatíma sem vélavörður.

Badda á Hofsstöðum við náttúruskoðun niður við sjó í Króksfjarðarnesi 2007.

Snilldarskáldið Badda á Hofsstöðum við Þorskafjörð (Bjargey Kristrún Arnórsdóttir), Erlingur Jónsson á Reykhólum og Hörður Grímsson á Tindum í Geiradal eru meðal þeirra fjölmörgu sem koma við sögu í fyrsta hefti nýrrar ritraðar hjá Vestfirska forlaginu undir heitinu Mannlíf og saga fyrir vestan, nýr flokkur. Á löngu árabili komu út hjá forlaginu tuttugu hefti undir samheitinu Mannlíf og saga fyrir vestan en fyrir nokkrum árum var ákveðið að láta staðar numið. Vegna fjölda áskorana frá áskrifendum og almennum lesendum hefur þráðurinn verið tekinn upp á nýjan leik.

Grettislaug á Reykhólum.

Umf. Afturelding (UMFA) hyggst leigja út auglýsingaskilti sem hengd verða innan á skjólvegginn kringum Grettislaug á Reykhólum. Ætlunin er að þau verði uppi í eitt ár en þeir sem vilja halda áfram borga þá fyrir eitt ár á ný. Skiltin fást í tveimur stærðum. Hæðin er í báðum tilvikum 90 cm en breiddin getur verið einn metri eða tveir metrar.

Dagur á Ísafirði 7. apríl 1909.

Þrymur Sveinsson fræðimaður frá Miðhúsum í Reykhólasveit sendi vefnum línukorn þar sem hann óskar upplýsinga um fréttaritið Gest í Reykhólasveit. Jafnframt vitnar hann í eftirfarandi örfrétt sem vikublaðið Dagur á Ísafirði birti 7. apríl 1909: „Ungmennafjelag er nýlega stofnað í Reykhólasveit. Í því eru bæði konur og karlar.“

Anna Greta Ólafsdóttir.

Samþykkt var á fundi hreppsnefndar Reykhólahrepps í kvöld að Anna Greta Ólafsdóttir verði ráðin skólastjóri sameinaðra skóla á Reykhólum, Leikskólans Hólabæjar og Reykhólaskóla. „Ég lauk B.Sc.-gráðu í íþróttafræðum frá Laugarvatni árið 2010 og þaðan fór ég beint í meistaranám í stjórnun á Bifröst. Mín helsta reynsla kemur úr íþróttaheiminum, þar sem ég hef þjálfað fimleika síðastliðin 11 ár. Ég hef fengist við viðburðastjórnun á sviði íþrótta- og menningarmála undanfarin ár,“ segir hún.

„Fækkun íbúa á Vestfjörðum er stærsta ógnin við framtíðarrekstur Orkubús Vestfjarða,“ sagði Kristján Haraldsson orkubússtjóri í ársskýrslu sinni á aðalfundi fyrirtækisins sem haldinn var á föstudag. „Árið 1984 bjuggu um 10.400 á veitusvæði Orkubús Vestfjarða en nú eru íbúar þar um 7.000. Með sama áframhaldi verður enginn íbúi eftir á Vestfjörðum að 50 árum liðnum. Stjórnvöld verða tafarlaust að grípa til aðgerða til að hindra frekari eyðingu byggðar og má þar fyrst nefna bættar samgöngur og jöfnun búsetukostnaðar, “ sagði Kristján.

Karlakórinn Vestri.

Karlakórinn Vestri í Vestur-Barðastrandarsýslu kemur í heimsókn á Reykhóla á morgun, uppstigningardag (fimmtudag 17. maí). Kórinn býður öllum sem áhuga hafa, hvort heldur er fólki í Reykhólahreppi, á Ströndum, í Dalabyggð eða öðrum, á tónleika í íþróttahúsinu á Reykhólum, þannig að aðgangur er ókeypis. Systurnar Maria Jolanta (Mariola) og Elzbieta Anna Kowalczyk hafa frá upphafi annast kórstjórn og undirleik hjá Vestra.

Jens Hansson í Mýrartungu, formaður Björgunarsveitarinnar Heimamanna í Reykhólahreppi, aðstoðaði sjö bíla sem lentu í vandræðum á Klettshálsi í veðuráhlaupinu tvo síðustu daga. Á sunnudag fór hann til aðstoðar við fjóra bíla og þrjá í gær. Fyrri daginn fór hann einn en þann seinni fóru fleiri með honum á sama bílnum.

Grettislaug á Reykhólum verður lokuð vegna árlegs vorviðhalds frá og með miðvikudaginum 16. maí. Stefnt er að því að opnað verði á ný fyrir hvítasunnu, sem er 27. maí. Frá því verður greint nánar þegar dagsetning liggur fyrir.

Hér skal minnt á lagasamkeppnina sem efnt er til í tengslum við Reykhóladagana í sumar. Úrslitin verða í íþróttahúsinu á Reykhólum 15. júní. Lag og texti verða að vera frumsamin og mega ekki hafa verið flutt opinberlega áður. Verðlaun eru kr. 50.000.