Tenglar

fimmtudagur 18. desemberá2008 |

Vestfirskur eljuma­ur hlřtur vi­urkenningu

HallgrÝmur Sveinsson, bˇndi og ˙tgefandi ß Brekku Ý Dřrafir­i.
HallgrÝmur Sveinsson, bˇndi og ˙tgefandi ß Brekku Ý Dřrafir­i.
1 af 3

Bókaútgefandinn vestfirski Hallgrímur Sveinsson á Brekku í Dýrafirði hlaut að þessu sinni 200 þúsund króna framlag úr sjóðnum Gjöf Jóns Sigurðssonar í viðurkenningarskyni fyrir bókarkorn sem hann samdi og gaf út á síðasta ári. Kver þetta ber heitið Jón Sigurðsson forseti, lítil sögubók, og mun Hallgrímur bæði hafa dreift því til sölu og gjafa. Þar á meðal sendi hann öllum þingmönnum eintak. Hallgrímur Sveinsson var í áratugi staðarhaldari á Hrafnseyri við Arnarfjörð og hefur flestum öðrum mönnum fremur á síðari árum haldið nafni Jóns forseta, sögu hans og arfleifð á lofti. Fyrir mörgum árum ritaði Hallgrímur og gaf út miklu stærri bók um Jón Sigurðsson, eins konar alþýðlega samantekt, sem út kom bæði á íslensku og ensku og var mjög höfð til gjafa.

 

Undir nafni Vestfirska forlagsins hefur Hallgrímur um tíu ára skeið gefið út fjölda bóka, sem langflestar eru helgaðar vestfirsku efni með einum eða öðrum hætti, en forlagið hefur á síðari árum gefið út allt upp í tólf titla á ári. Útgáfustarfið í þágu vestfirskra fræða og vestfirskra málefna er og hefur verið brennandi áhugamál Hallgríms en ekki gróðavegur. Hann og eiginkona hans, Guðrún Steinþórsdóttir, bjuggu á Hrafnseyri í rúm 40 ár, ráku þar fjárbúskap og sáu um vörslu og umhirðu staðarins fyrir hönd Hrafnseyrarnefndar. Var það starf löngum unnið í sjálfboðavinnu, en síðari árin fékk Hallgrímur lítils háttar þóknun frá því opinbera sem staðarhaldari.

 

Sjóðurinn Gjöf Jóns Sigurðssonar var stofnaður samkvæmt erfðaskrá Ingibjargar Einarsdóttur, ekkju Jóns Sigurðssonar forseta, dagsettri 12. desember 1879. Alþingi samþykkti reglur um sjóðinn 24. ágúst 1881 og voru þær staðfestar af konungi 27. apríl 1882. Sjóðurinn veitti um skeið allmörgum fræði- og vísindamönnum viðurkenningu fyrir vel samin rit og styrkti útgáfu þeirra og merkra heimildarrita. Síðar varð sjóðurinn sakir verðbólgu lítils megnugur. Árið 1974 ákvað Alþingi að efla hann með árlegu framlagi og er nú veitt til hans á fjárlögum jafngildi árslauna prófessors við Háskóla Íslands. Í tímanna rás hafa verið gerðar lítils háttar breytingar á reglum um sjóðinn, en hin upphaflegu markmið hafa þó jafnan verið höfð í huga.

 

Sjóðurinn starfar á vegum forsætisráðuneytisins. Styrkjum úr honum hefur undanfarin ár verið úthlutað á tveggja ára fresti.

 

Þess skal getið, að undanfarin ár hefur Reykhóladeild Lionsklúbbs Búðardals fengið útgáfubækur Vestfirska forlagsins til sölu í héraðinu fyrir jólin til fjáröflunar fyrir samfélagsverkefni sín. Svo er einnig fyrir þessi jól.

 

Skrifa­u athugasemd:


Atbur­adagatal

« Desember 2020 »
S M Ů M F F L
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31