Árið 2009 er fyrsta heila árið sem hinum nýja vef Reykhólahrepps er haldið úti, en hann var opnaður vorið 2008. Á hinu nýliðna ári voru heimsóknir á vefinn alls 99.728 og flettingar 348.068 samkvæmt vefmælingu Google Analytics. Þannig vantar ekki nema tæplega þrjú hundruð upp á hundrað þúsund heimsóknir á árinu. Fréttir sem settar voru í fréttadálkinn eru 528 og atburðir í atburðadagatali nokkuð á annað hundrað. Fundargerðir hreppsnefndar Reykhólahrepps og undirnefnda hans sem settar voru á vefinn eru 36. Þar fyrir utan eru tilkynningar, aðsent efni, myndasyrpur og sitthvað fleira.

 

Eins og gefur að skilja eru langflestar heimsóknirnar á vefinn hér innanlands. Hins vegar má koma nokkuð á óvart, að hann hefur skv. vefmælingunni verið heimsóttur á nýliðnu ári í 83 löndum í öllum heimshornum. Þau lönd þar sem hann hefur verið heimsóttur oftast næst á eftir Íslandi eru eftirtalin og í þessari röð: Bretland, Bandaríkin, Danmörk, Noregur, Svíþjóð, Þýskaland, Spánn, Kanada og Holland. Ljóst má vera að í öllum þessum löndum og allmörgum fleiri er fólk sem fylgist reglulega með vefnum. Þetta bendir til þess, að hann sé ekki aðeins heimafólki í Reykhólahreppi hugsanlega til nokkurs gagns og fróðleiks, heldur einnig að fólk með rætur í héraðinu vilji fylgjast með því sem fram vindur á gömlum slóðum.

 

Hér fylgja nokkrar ótextaðar svipmyndir sem birst hafa á nýliðnu ári. Smellið á myndirnar til að stækka þær.