Bæjarhátíðin góðkunna Hamingjudagar á Hólmavík hófst í gær en galdramaður Strandagaldurs var fenginn til að setja hana formlega. Dagskráin er fjölbreytt að venju en líklega ber einna hæst þátttöku Gunnars Þórðarsonar tónlistarmanns, sem er Hólmvíkingur að uppruna en kom nú fram á Hamingjudögum í fyrsta sinn. Í gærkvöldi hélt hann stórtónleika og síðan er talið að á fimmta hundrað manns hafi verið við varðeld og brekkusöng þar sem presthjónin Sigga og Gulli héldu uppi fjörinu ásamt Gunnari. Í dag hefur verið margþætt skemmtidagskrá sem lýkur síðan í kvöld á Hamingjudansleik með hljómsveitinni Von.

 

Á morgun verða Furðuleikarnir haldnir í Sauðfjársetri á Ströndum, eins og hér hefur verið greint frá, en þeir eru einn af hápunktum Hamingjudaga hverju sinni.

 

Myndirnar sem hér fylgja sendi Kristín Sigurrós Einarsdóttir á Hólmavík, en þær voru teknar í gærkvöldi.