Kvennahlaup Íþróttasambands Íslands er í dag, laugardaginn 20. júní, tuttugasta árið í röð. Formlegir hlaupastaðir á landinu munu vera yfir áttatíu, þar á meðal á Reykhólum, þar sem lagt verður af stað frá Grettislaug klukkan 11. Fjórar vegalengdir eru í boði, 2, 5, 7 og 10 kílómetrar. Frítt er í sund í Grettislaug að hlaupi loknu. Markmið Kvennahlaupsins hefur frá upphafi verið að hvetja konur á öllum aldri til aukinnar hreyfingar og heilsueflingar, ekki aðeins þennan eina dag heldur sem flesta daga ársins.

 

Fyrsta hlaupið fór fram í Garðabæ árið 1990 og hlupu þá um 2500 konur. Á þessum 20 árum hefur þátttakan margfaldast og nú er hlaupið einn vinsælasti almenningsíþróttaviðburður á landinu.  Þá hefur hlaupið einnig teygt anga sína víðar og er nú hlaupið um allan heim, allt frá Íslandi til Ástralíu. Allt frá 1993 hefur Sjóvá hefur verið helsti styrktaraðili hlaupsins.