Einn af viðburðum Reykhóladaganna er gönguferð undir leiðsögn á laugardagsmorgun. Þátttakendur hittast hjá Litlu-Kleif, en þangað er ekið framhjá Stað og Árbæ áleiðis að Laugalandi. Þar tekur Björn Samúelsson leiðsögumaður á móti fólkinu og lagt verður af stað fótgangandi kl. 10. Gengið verður að Laugalandi og skoðað það sem fyrir augun ber. Áætlaður göngutími er tvær klukkustundir og tekið er fram að þetta sé ferð fyrir unga jafnt sem aldna.